Duket se dashuria nuk pyet për moshën, as për skenarin, të paktën jo në rastin e Pamela Anderson dhe Liam Neeson. Dyshja, që u njoh gjatë xhirimeve të filmit komedi "The Naked Gun", janë përfshirë në një romancë që ka kaluar përtej kamerave. Sipas një burimi për revistën PEOPLE, marrëdhënia mes tyre është në fazat e hershme, por është "e sinqertë" dhe “është e qartë që janë të marrosur për njëri-tjetrin”.
Pamela, 58 vjeç dhe Liam, 73, kanë kaluar shumë kohë bashkë në javët e fundit gjatë turneut promovues për filmin që del në kinema më 1 gusht. Të dy shfaqen shpesh të buzëqeshur dhe shumë të afërt gjatë eventeve publike. Gjatë premierës në Londër, Pamela i dha një puthje të përzemërt në faqe Liam-it, ndërsa në një paraqitje të përbashkët në emisionin Today Show, ata improvizuan një skenë romantike ku u “kapën mat” duke u puthur.
Të dy kanë nga dy djem dhe madje u shfaqën të gjithë së bashku në tapetin e kuq në premierën e filmit në New York. Djali i madh i Anderson, Brandon dhe vëllai i tij Dylan, ishin krah nënës së tyre, ndërsa Neeson kishte pranë djemtë Micheál dhe Daniel, të lindur nga martesa e tij me aktoren tashmë të ndjerë Natasha Richardson.
Interesante është që vetëm pak muaj më parë, Neeson deklaroi për PEOPLE se nuk kishte më interes për takime romantike. “Kam mbaruar punë me lidhjet,” tha ai në një intervistë në 2024, duke shtuar se po e jetonte jetën më shumë në qetësi dhe introspektivitet. Por duket se Pamela e ka ndryshuar këtë qasje.
Në të njëjtën kohë, edhe Anderson ka qenë e rezervuar rreth jetës personale vitet e fundit. Por në intervista të fundit ajo e ka përshkruar Neeson-in si një “zotëri të vërtetë” që “nxjerr më të mirën nga ti”, ndërsa ai është shprehur i hapur për admirimin që ndjen ndaj saj “Jam i dashuruar me të. Nuk ka ego të madhe, është e përkushtuar, e sjellshme dhe shumë e lehtë për të punuar”.
Gjatë xhirimeve të "The Naked Gun", Pamela dhe Liam raportohet se janë afruar edhe përtej skenës, duke darkuar shpesh së bashku me asistentët e tyre dhe duke ndarë biseda për letërsinë e jetën. Pamela tregon se marrëdhënia e tyre gjatë xhirimeve mbeti “profesionalisht romantike”, por atmosfera e ngrohtë mes tyre ishte e pakundërshtueshme.
Burimi: People
