Producenti i njohur muzikor, Sean "Diddy" Combs, është shpallur i pafajshëm për tre nga pesë akuzat me të cilat përballej në një proces gjyqësor që ka tronditur botën. Ai akuzohej për trafikim seksual, pjesëmarrje në grup kriminal, shantazh, zjarrëvënie dhe të tjera vepra penale.
Megjithatë ai u shpall i pafajshëm për trafikim seksual në dy raste, në atë të ish-të dashurës së tij Cassie Ventura dhe “Jane Doe”, dhe një tjetër akuzë për përfshirje në grup kriminal.
Nga ana tjetër, ai u shpall fajtor për dy akuza që lidhen me trafikimin e qenieve njerëzore me qëllim prostitucionin.
Sipas raportimeve të CNN, pasi dëgjoi vendimin, Combs u përkul në gjunjë para vendit të tij në sallën e gjyqit, uli kokën dhe dukej sikur po lutej. Më pas u ngrit, u kthye nga të pranishmit dhe filloi të duartrokiste.
Ai përqafoi avokatët e tij, dhe i kthyer nga familja, tha me zë të lartë:
“Faleminderit! Të dua, mami! Të dua! Të dua! Të dua!”
Gjykimi i tij nisi më 12 maj dhe zgjati pothuajse tetë javë. Reperi 55-vjeçar nuk ka pranuar fajësinë për asnjë nga akuzat dhe vazhdon të mohojë me forcë çdo shkelje ligjore, përfshirë dhe ato që lidhen me padi të mëparshme.
Sean “Diddy” Combs, një nga figurat më të fuqishme në industrinë muzikore amerikane për më shumë se dy dekada, është përballur vitet e fundit me një sërë akuzash serioze. Arrestimi dhe aktakuza federale ndaj tij erdhën pas një hetimi të gjatë të Agjencisë për Sigurinë Kombëtare (Homeland Security), që përfshinte edhe bastisjen e shtëpive të tij në Los Angeles dhe Miami në shtator të vitit të kaluar. Në aktakuzë, ai përshkruhej si “truri” pas një organizate kriminale që organizonte “Freak-Off party”, festa ku ndodhnin abuzime seksuale, konsumohej drogë dhe aktivitetet e tjera të paligjshme.
