Jennifer Lopez dhe Ben Affleck mund të kenë ende “shumë dashuri” për njëri-tjetrin pas divorcit në vitin 2024, por këngëtarja nuk heziton të bëjë humor me ish-bashkëshortin dhe martesën e tyre dyvjeçare. Një shembull i kësaj ishte reagimi i saj i papritur kur takoi një burrë me emrin “Ben” në një nga koncertet e saj në Las Vegas.
Gjatë koncertit të saj në Caesars Palace, ajo ka ndërthurur hitet më të mëdha me komente plot ironi për jetën e saj personale, përfshirë katër martesat dhe stilin e saj provokues. Në një performancë të fundit, ajo nuk i rezistoi tundimit për të bërë një batutë edhe për ish-partnerin.
Në një video të shpërndarë më 23 mars, ajo shihet duke zgjedhur një fans nga publiku për ta ftuar në skenë. Burri ngjitet në skenë dhe pozon me balerinët ndërsa publiku brohoret, kur ajo i kërkon të afrohet dhe e pyet për emrin.
Kur ai i përgjigjet se quhej “Ben”, ajo reagon menjëherë me një “ugh!” spontan dhe bën një mimikë të bezdisur fytyre. Megjithatë, ajo e tregoi qartë se ishte thjesht shaka, pasi më tej buzëqeshi dhe shpërtheu në të qeshura, duke e tërhequr atë pas perdes bashkë me grupin e saj të kërcimit.
Më parë, këngëtarja ka treguar se ndarja e dytë nga Affleck “pothuajse e shkatërroi”, por dy vite më vonë ajo po jeton një periudhë të lumtur si beqare dhe nuk ka asnjë nxitim të krijojë një lidhje të re dashurore.
Madje, gjatë një koncerti në Spanjë në korrik 2025, ajo la të kuptohej me humor se nuk dëshiron të martohet më, kur iu përgjigj një fansi që i propozoi duke thënë: “Mendoj se kam mbaruar me këtë punë. E kam provuar disa herë.”
