Një pikturë nga Banksy, artist anonim, veprat e të cilit vlerësohen me shifra marramendëse, është fshirë nga muri i jashtëm i Gjykatës Mbretërore të Drejtësisë në Londër. Në pikturë paraqitet një gjykatës, i cili rreh me “çekanin e drejtësisë” një protestues të pambrojtur. Protestuesi mban një pankartë të bardhë, të lyer me bojë të kuqe, e cila ngjan si gjak.
Banksy e konfirmoi veprën në Instagram, gjatë mëngjesit të së hënës. (Artisti i konfirmon gjithnjë veprat e tij në rrjetet sociale). Dëshmitarët okularë thanë se rojet e sigurisë u vendosën përpara murales, i cili supozohet se u referohet protestave pro-palestinezëve në Gaza.
Një prej dëshmitarëve tha se kaloi aty rreth orës 8:30 të hënën kur rojet po përpiqeshin të ndalonin njerëzit që të bënin foto. Më pas, mbërritën punonjës të tjerë me materiale për ta mbuluar.
“Mendoj se është e turpshme që thjesht e mbuluan. Është e qartë se ata kanë frikë nga reagimi që kjo do të shkaktojë”, shtoi personi, i cili gjithashtu pa nga afër arrestimet e bëra në protestën me mijëra njerëz në Londër, për mbrojtjen e palestinezëve në Gaza. Policia ndaloi gati 900 persona në demonstratën që mbushi rrugët e Londrës.
Banksy, identiteti i të cilit mbetet i panjohur, njihet për veprat e tij politike dhe shpeshherë, ka provokuar përmes artit, duke shfaqur pikëpamjet e tij në Izrael, Turqi, Mbretërinë e Bashkuar, SHBA etj.
