Instagram/Shakira

Shakira është rikthyer fuqishëm në skenë me turneun botëror “Las Mujeres Ya No Lloran”, por këtë herë vëmendjen po e merr jeta e saj private. Një moment personal ka bërë xhiron e rrjeteve sociale dhe ka ndezur diskutime të shumta mes fansave.

Këngëtarja kolumbiane u pa duke darkuar në San Diego, në shoqërinë e ish-partnerit të saj Antonio de la Rúa. Në një video të shpërndarë në internet, këngëtarja duket e buzëqeshur dhe e lumtur pranë Antonios në një restorant luksoz, momente që kanë ngjallur dyshime për një ribashkim të mundshëm.

Kjo paraqitje publike nuk ishte krejtësisht e papritur për fansat më të vëmendshëm. Që prej vitit 2024, kanë nisur të qarkullojnë shenja të vogla për një afrim mes tyre. Një nga momentet e para ishte kur Antonio "pëlqeu" një postim të Shakirës me rastin e Ditës së Nënës.

Në fillim të vitit 2025, pas pushimeve të këngëtares në Punta del Este, Uruguai, u përfol se ajo nuk qëndroi në hotel, por në La Colorada, shtëpia e Antonios. Madje, burime jozyrtare thonë se ai ka marrë një rol si menaxher në turneun aktual të saj.

Gjithashtu, gjatë koncertit të Shakirës në Argjentinë, ajo ftoi në skenë vajzën e Antonios, Zulun, për një moment të ngrohtë që u shpërnda gjerësisht në rrjet.

Ndërkohë, në darkën e fundit në San Diego, veç ish-çiftit ishin të pranishëm edhe dy djemtë e Shakirës, Sasha dhe Milan, si dhe vëllai i saj, Tonino, një tjetër detaj që shton dyshimet për një lidhje më shumë se thjesht miqësore.

Shakira dhe Antonio de la Rúa u takuan në vitin 2000, përpara se ajo të bëhej një yll ndërkombëtar. Djali i ish-presidentit të Argjentinës nuk ishte vetëm partneri i saj romantik, por edhe një këshilltar strategjik, që ndihmoi në planifikimin e kalimit të saj në tregun ndërkombëtar.

Bashkë ata realizuan albumin “Laundry Service” (2001), i cili përmbante hitin “Whenever, Wherever” dhe shënoi nisjen e epokës globale të Shakirës.

Por lidhja përfundoi në vitin 2011, mes mosmarrëveshjesh dhe betejash ligjore. Antonio kërkoi një pjesë të fitimeve të këngëtares, duke pretenduar se ka dhënë kontribut në suksesin e saj. Ndarja u përkeqësua edhe më shumë kur Shakira nisi një marrëdhënie të re me futbollistin Gerard Piqué.