Victoria Beckham ka folur për herë të parë pas akuzave të djalit të saj, Brooklyn Peltz Beckham, i cili deklaroi se nuk dëshiron pajtim me familjen dhe pretendoi se prindërit e tij u përpoqën të “shkatërrojnë” marrëdhënien e tij me bashkëshorten, Nicola Peltz Beckham.
Duke folur për The Wall Street Journal në një intervistë të publikuar më 16 prill, Victoria u shpreh shkurt për situatën familjare:
“Gjithmonë kemi provuar të jemi prindërit më të mirë që mundemi. Dhe, e dini, kemi qenë në sy të publikut për më shumë se 30 vite tani, dhe gjithçka që kemi bërë ka qenë të mbrojmë fëmijët tanë dhe t’i duam ata. Kjo është gjithçka që me të vërtetë dua të them për këtë.”
Më herët këtë vit, Brooklyn e bëri të qartë se marrëdhënia me familjen e tij është e prishur. Ai deklaroi publikisht: “Nuk dua pajtim me familjen time.”
Në një story në Instagram më 19 janar, ai tha se nuk po kontrollohet më dhe se po mbron veten për herë të parë në jetën e tij.
“Gjatë gjithë jetës time, prindërit e mi kanë kontrolluar narrativën në media për familjen tonë. Postimet e inskenuara në rrjete sociale, eventet familjare dhe marrëdhëniet jo të sinqerta kanë qenë pjesë e jetës ku jam rritur,” shkroi ai.
Sipas tij, konflikti me familjen filloi para martesës së tij në vitin 2022 me Nicola Peltz Beckham, kur prindërit e tij dyshohet se i kërkuan të nënshkruante dokumente për të hequr dorë nga të drejtat e emrit të tij.
Ai gjithashtu pretendoi se Victoria anuloi në moment të fundit punën për fustanin e dasmës së Nicola-s dhe se gjatë dasmës ka pasur momente të sikletshme, përfshirë një vallëzim të papritur që nuk ishte planifikuar.
Brooklyn tha gjithashtu se bashkëshortja e tij është trajtuar me mungesë respekti nga familja Beckham dhe se pavarësisht përpjekjeve të tyre për të ruajtur një imazh familjar publik, marrëdhëniet kanë mbetur të ftohta.
Në deklaratat e tij, ai shtoi se pas distancimit nga familja ndjen më pak ankth dhe më shumë qetësi:
“Zgjohem çdo mëngjes mirënjohës për jetën që kam zgjedhur dhe kam gjetur paqe dhe lehtësim.”
Ai dhe Nicola deklaruan se nuk duan një jetë të ndikuar nga imazhi publik apo media, por vetëm privatësi dhe qetësi për familjen e tyre.
Në vitet e mëparshme, familja Beckham është përballur me thashetheme të ndryshme për tensione, përfshirë mungesat në evente familjare, mosmarrëveshje në dasmë dhe largim gradual nga aktivitetet familjare publike.
Victoria, David dhe pjesa tjetër e familjes nuk kanë dhënë më shumë komente publike për konfliktin, përveç deklaratës së fundit të Victoria-s ku ajo theksoi vetëm dashurinë dhe mbrojtjen për fëmijët e saj.
