Një muze historik që u trondit nga një grabitje spektakolare
Të armatosur me mjete profesionale dhe plan të mirëorganizuar, disa persona hynë në një nga sallat më të zbukuruara të muzeut dhe u larguan me tetë bizhuteri historike të paçmueshme. Muzeu më i vizituar në botë u mbyll menjëherë të dielën pas grabitjes, e cila kishte në shënjestër dy vitrina në Galerinë Apollon, ku ruhen bizhuteritë e kurorës franceze.
Bizhuteritë e vjedhura
- Mes bizhuterive ishte edhe një varëse me smeraldë dhe diamante që Napoleoni ia kishte dhuruar gruas së tij, Maria Luiza.
- Një kurorë e perandoreshës Eugénie, bashkëshortja e Napoleonit III, u gjet e thyer pranë muzeut pasi hajdutët u arratisën. Ajo ishte e stolisur me shqiponja të arta, 1,354 diamante dhe 56 smeraldë.
- Të tjera bizhuteri të vjedhura përfshinin një varëse dhe vathë me safir që i përkisnin Hortense-s, vajzës së njerkës së Napoleonit, e cila më vonë u bë mbretëreshë e Holandës, si dhe mbretëreshës Marie Amélie në shekullin XIX.
Ministria franceze e Kulturës konfirmoi se tetë objekte u vodhën, përfshirë edhe varësen e Napolonit.
Mbyllja e muzeut
Njerëzit u evakuuan menjëherë dhe muzeu u mbyll për të ruajtur provat dhe për t’u dhënë mundësi hetuesve dhe ekspertëve të gjurmëve të punojnë në vendngjarje. Ministri shkroi më vonë në rrjete sociale:
“Të sulmosh Luvrin, do të thotë të sulmosh historinë dhe trashëgiminë tonë.”
Muzeu njoftoi se do të mbyllej për arsye të jashtëzakonshme gjatë gjithë ditës.
Hetimet
Prokuroria e Parisit ka hapur një hetim zyrtar për vjedhjen dhe po vlerëson vlerën e saktë të objekteve të vjedhura. Ministria e Kulturës bëri të ditur se alarmet u aktivizuan menjëherë kur u hapën vitrinat, ndërsa rojat ndërhynë, por hajdutët arritën të arratiseshin duke lënë pas pajisjet e tyre.
Sipas Le Parisien, hajdutët ishin të veshur si punëtorë ndërtimi, me xhaketa të verdha, për të mos ngjallur dyshime.
Ministri i Brendshëm francez, Laurent Nuñez, vizitoi vendngjarjen dhe e përshkroi grabitjen si “një operacion të organizuar në mënyrë të përsosur”. Ai tha për radion France Inter:
“U vodhën bizhuteri me vlerë të paçmuar, me rëndësi të jashtëzakonshme për trashëgiminë tonë kulturore.”
Sipas tij, hajdutët sulmuan në orën 09:30 të mëngjesit dhe iu deshën vetëm 7 minuta për të marrë bizhuteritë. Ata përdorën kamio dhe ngritëse për t’u futur nga një pjesë ku po kryheshin punime ndërtimi dhe thyen xhamat me mjet prerës industrial.
Nuñez tha se dyshohet për tre ose katër autorë, të gjithë profesionistë, që kishin “studiuar paraprakisht çdo detaj të ndërtesës”. Policia po analizon pamjet e kamerave të sigurisë për të përcaktuar identitetin e tyre.
Reagimet e qeverisë
Ministrja franceze e Kulturës, Rachida Dati, ishte e para që njoftoi incidentin në rrjetet sociale:
“Një grabitje ndodhi këtë mëngjes në momentin e hapjes së muzeut të Luvrit. Fatmirësisht, nuk ka të lënduar,” – shkroi ajo.
Kryetari socialist i qendrës së Parisit, Ariel Weil, u shpreh “i tronditur”, duke thënë se ngjarja “duket si një skenar filmi”.
Ndërsa kreu i partisë së ekstremit të djathtë Rassemblement National, Jordan Bardella, tha:
“Luvri është një simbol global i kulturës sonë. Kjo grabitje, që i lejoi hajdutëve të marrin bizhuteritë e kurorës franceze, është një turp i padurueshëm për vendin tonë.”
Presidenti Emmanuel Macron reagoi në X, duke thënë:
“Kjo grabitje në Luvër është një sulm ndaj trashëgimisë që e duam sepse është vetë historia jonë. Do t’i rikthejmë veprat dhe fajtorët do të përballen me drejtësinë!”.
Muzetë në shënjestrën e grabitësve
Luvri është një nga qendrat më të mëdha të artit në botë, me mbi 8 milionë vizitorë në vit, që shohin gjithçka; nga skulpturat klasike te piktura e Mona Lisa-s.
Në vitin 1911, piktura “Mona Lisa” u vodh nga një punëtor italian, Vincenzo Peruggia, i cili e fshehu gjithë natën në një dollap të muzeut. U deshën 24 orë që mungesa e saj të vërehej dhe tabloja u rikthye vetëm pas tre vitesh, pasi u gjet në Firence.
Grabitja më e fundit ndodhi në vitin 1998, kur një pikturë e Jean-Baptiste-Camille Corot u hoq nga muri dhe nuk u gjet kurrë.
Së fundmi, disa muze francezë janë bërë objektiv i hajdutëve. Në nëntor të 2024-ës, katër burra me sëpata dhe shkopinj bejsbolli thyen vitrina në muzeun "Cognacq-Jay" në Paris, duke vjedhur objekte të çmuara të shekullit XVIII, disa prej tyre të huazuara nga vetë Luvri dhe koleksioni mbretëror britanik.
