Një letër personale e shkruar nga Princesha Diana po rikthen vëmendjen te vitet e para të martesës së saj me Mbretin Charles III. Dokumenti, që së shpejti do të dalë në ankand, zbulon rrëfime personale të Diana-s për jetën e saj si e sapomartuar dhe për përpjekjet për t’u përshtatur me familjen mbretërore.

Letra është pjesë e një koleksioni sendesh personale që do të nxirren në shitje nga shtëpia e ankandeve Gorringe’s më 7 korrik. Koleksioni i përket Katherine Hanbury, mikeshë e fëmijërisë së Diana-s, me të cilën ajo ndoqi West Heath Girls' School gjatë viteve të adoleshencës.

Në të ashtuquajturën “Letra e Muajit të Mjaltit”, Diana përshkruan jetën e saj pas martesës me Charles në vitin 1981.

“Kaluam një muaj mjalti të mrekullueshëm me diell të pafund dhe det të qetë”, shkruante ajo, ndërsa tregonte se po qëndronin në Skoci deri në fund të tetorit.

Ajo shtonte se i pëlqente jeta larg Londrës dhe koha në natyrë.

Në një pjesë tjetër të letrës, Diana përshkruan jetën e re mbretërore:

“Është si të luash me të rritur!”.

Komenti i saj është parë nga shumë si një shenjë e vështirësive që po përjetonte duke u përshtatur me protokollet dhe presionin e jetës në pallat.

Letra daton më 27 shtator 1981 dhe është shkruar gjatë qëndrimit të çiftit në Balmoral Castle. Interesant është fakti se Diana shprehte hapur dashurinë për jetën në fshat dhe mospëlqimin për Londrën, diçka që më vonë u raportua si një nga arsyet e keqkuptimeve mes saj dhe Charles.

Pas dasmës së famshme në St Paul's Cathedral më 29 korrik 1981, Charles dhe Diana nisën një muaj mjalti luksoz në jahtin mbretëror HMY Britannia, duke udhëtuar në Egjipt dhe ishujt grekë përpara se të shkonin në Skoci.

Koleksioni që del në ankand përfshin gjithashtu fotografi të rralla nga vitet shkollore të Diana-s, mes tyre edhe një foto me aktoren Tilda Swinton, si dhe një program nga ceremonia përkujtimore pas vdekjes së saj në vitin 1997.

Vlera e koleksionit vlerësohet mes 5,400 dhe 8,000 dollarëve. Sipas specialistëve të ankandit, këto dokumente ofrojnë një pamje të rrallë të saj përpara se fama dhe detyrimet mbretërore t'i ndryshonin jetën përgjithmonë.