Gjatë prindërimit, ndoshta nuk ka asgjë më të rëndësishme se komunikimi me fëmijën. Shpesh, përmes disa pyetjeve që në pamje të parë duken të thjeshta apo të parëndësishme, mund të zhvilloni imagjinatën e të voglit tuaj dhe njëkohësisht të zbuloni më shumë për mendimet, ndjenjat dhe mënyrën si e sheh botën.
Për këtë arsye, më poshtë kemi përgatitur një listë pyetjesh që mund t’ia bëni fëmijës suaj që tani - pyetje që mund të nisin biseda interesante dhe të krijojnë një lidhje më të fortë mes jush.
Çfarë ta pyesni në vend të “Si të shkoi dita?”
Në vend të kësaj pyetjeje të zakonshme, mund të provoni disa alternativa që e nxisin fëmijën të tregojë më shumë:
1. Çfarë mësove sot?
2. Çfarë të bëri të qeshje sot?
3. Ndihmove dikë gjatë ditës?
4. Çfarë të habiti sot?
5. U mërzite për ndonjë gjë?
6. Çfarë luajte me miqtë e tu?
7. Cili mësues të pëlqen më shumë dhe pse?
8. Ndodhi ndonjë situatë e pakëndshme sot?
9. Çfarë të acaroi gjatë ditës?
10. Me çfarë e pate më të vështirë këtë javë?
Pyetje që zhvillojnë mendimin krijues
Disa pyetje mund të ndihmojnë edhe në zhvillimin e imagjinatës së fëmijës:
1. Nëse do të kishe një llambë magjike, cilat dëshira do të realizoje?
2. Çfarë shpikjeje mendon se i duhet botës sot?
3. Nëse do të mund t’i bëje një pyetje një kafshe të egër, çfarë do ta pyesje?
4. Cila kafshë mendon se do të ishte më e mira për të drejtuar një makinë?
5. Nëse nga qielli do të binte ushqim, çfarë do të doje të ishte?
Pyetje që zbulojnë botën e brendshme të fëmijës
Këto pyetje mund t’ju ndihmojnë të kuptoni më mirë personalitetin dhe ndjenjat e tij:
1. Cilat janë pesë fjalët që të përshkruajnë më mirë?
2. Çfarë të pëlqen më shumë te vetja? Po çfarë nuk të pëlqen?
3. Nëse do të jetoje si një tjetër person për një ditë, kë do zgjidhje?
4. Cili aktivitet të bën më të lumtur?
5. Çfarë të frikëson apo të bën të qash?
6. Nëse do të shkruaje një libër, për çfarë do të ishte?
7. Nëse do të hapje një dyqan tëndin, çfarë do të shisje?
8. Çfarë ndjen kur të përqafoj?
9. Çfarë do të bëje nëse dikush të fyen?
10. Nëse bëhesh i famshëm, për çfarë do të doje të njiheshin njerëzit?
Pyetje për jetën dhe mënyrën si funksionon bota
Fëmijët shpesh kanë mendime shumë interesante për tema të mëdha. Mund t’i pyesni edhe për gjëra më filozofike:
1. Pse duhet të shkosh në shkollë?
2. Duhet t’i dëgjosh gjithmonë prindërit?
3. A duhet t’i respektosh gjithmonë të rriturit?
4. A ka të drejtë një njeri të vjedhë ushqim nëse ka shumë uri?
5. A mund të bësh gjithmonë atë që dëshiron?
6. Pse gënjejnë njerëzit?
7. Pse divorcohen njerëzit?
8. Pse disa pinë cigare edhe pse e dinë që janë të dëmshme?
9. Çfarë është dashuria?
10. A mund të jesh gjithmonë i lumtur dhe kurrë i trishtuar?
11. A janë njerëzit të barabartë?
12. A ka një mënyrë për të shmangur luftën?
13. Duhet ta pranosh veten ashtu siç je?
14. A mund ta ndryshosh fatin tënd?
15. Cili është kuptimi i jetës?
Pyetje të tilla mund të ndihmojnë fëmijën të zhvillojë mendimin kritik dhe të kuptojë më mirë ndjesitë e tij si edhe botën që e rrethon.
