Leonid Radvinsky, pronari i platformës së njohur OnlyFans, ka ndërruar jetë në moshën 43-vjeçare pas një beteje të gjatë me kancerin.

Lajmi u konfirmua nga kompania të hënën, ndërsa familja ka kërkuar privatësi në këtë moment të vështirë.

Radvinsky, një miliarder ukrainas-amerikan me një pasuri të vlerësuar rreth 3.8 miliardë dollarë, ishte figura kryesore pas rritjes së OnlyFans. Ai bleu kompaninë mëmë Fenix International Limited në vitin 2018 dhe shërbeu si aksioner kryesor. I lindur në Odesa dhe i rritur në Çikago, Radvinsky studoi ekonomi në Universitetin Northwestern dhe hyri herët në industrinë e faqeve për të rritur.

Në muajt e fundit, ai ishte në bisedime për të shitur rreth 60% të aksioneve të OnlyFans, në një marrëveshje që do ta vlerësonte kompaninë në rreth 8 miliardë dollarë.

OnlyFans, e themeluar në vitin 2016, u bë platformë e njohur sidomos gjatë pandemisë, duke u kthyer në një burim të rëndësishëm të ardhurash për krijuesit e përmbajtjes. Platforma funksionon me abonime dhe mban rreth 20% të fitimeve, ndërsa pjesa tjetër shkon për krijuesit, duke i sjellë Radvinsky-t dividentë prej qindra milionë dollarësh ndër vite.