Sezoni i tretë (dhe ndoshta i fundit?) i serialit “Euphoria”, i çon personazhet e tij në një “ferr” të ri, që në sytë e krijuesit Sam Levinson do të thotë hyrje në botën e punës seksuale.
Rue (Zendaya) futet në trafik droge, duke transportuar fentanil nga Meksika në SHBA dhe punon në një klub striptizmi për të shlyer borxhet e mëdha ndaj Laurie; Jules (Hunter Schafer) fiton para të mëdha si “sugar baby” për një kirurg plastik; Cassie (Sydney Sweeney) hap një llogari në OnlyFans për të paguar shpenzimet absurde të dasmës së saj me Nate (Jacob Elordi); ndërsa Maddy (Alexa Demie) bëhet menaxhere e Cassie-t dhe përpiqet ta kthejë në yllin e radhës të rrjeteve sociale.
Rruga e Cassie-t në OnlyFans nis me video të çuditshme ku ajo pozon si qen, me veshë, zinxhir, bisht, pranga dhe kostum, duke u përkulur dhe duke pirë ujë nga një tas. Më pas ajo shfaqet e veshur si foshnjë, e shtrirë në divan me rroba të tejdukshme rozë, me flokët në gërsheta dhe një lodër në gojë. Fotot për llogarinë e saj i bën kujdestarja e shtëpisë.
Por ky portretizim ka zemëruar krijueset e vërteta të OnlyFans, të cilat thonë se seriali e shtrembëron punën e tyre dhe e kthen në objekt talljeje.
Sipas tyre, shumë nga skenat janë joreale dhe madje të pamundura sipas rregullave të platformës. Për shembull, përmbajtja me role fëmijësh është rreptësisht e ndaluar nga OnlyFans dhe mund të çojë në mbylljen e llogarisë.
Krijueset e platformës thonë se seriali ushqen stereotipe të vjetra për punën seksuale, duke e paraqitur si diçka qesharake, të ekzagjeruar dhe pa etikë, ndërkohë që në realitet është një punë që ndjek rregulla strikte dhe kërkon profesionalizëm.
Maitland Ward, një krijuese e njohur në OnlyFans dhe ish-aktore e “Boy Meets World” dhe “White Chicks”, thotë se skena e foshnjës është veçanërisht problematike sepse përforcon stereotipe të rreme për punonjëset e seksit.
“Në klimën ku jemi, fakti që e veshin si foshnjë për të bërë përmbajtje pornografike është shumë shqetësues dhe ushqen idenë se punonjëset e seksit nuk kanë moral dhe bëjnë gjithçka për para,” thotë ajo. “Dhe gjithmonë ekziston stigma e gabuar që puna seksuale është njësoj si trafikim ose abuzim. Dhe ata thjesht e kthejnë në shaka. Nuk është aspak për të qeshur.”
Sipas krijueses Alix Lynx, kjo pjesë është më afër realitetit të marketingut digjital, por pjesa tjetër është e shtrembëruar:
“Nuk është e vërtetë që mjafton të vishesh çuditshëm dhe të fitosh para menjëherë. Duhet të ndërtosh audiencë dhe marrëdhënie me ndjekësit,” thotë ajo.
Regjisori Sam Levinson e justifikon këtë linjë historie si një satirë që synon të tregojë “absurditetin” e botës së Cassie-t dhe ta bëjë shikuesin të ndihet jo komod, por kritikët thonë se rezultati është më shumë tallës sesa reflektues.
Sipas krijueseve të OnlyFans, problemi kryesor është se seriali e redukton suksesin në platformë vetëm në pamje dhe sjellje ekstreme, ndërkohë që në realitet kërkon ndërtim audience, strategji dhe punë të vazhdueshme.
