Një trend i rrezikshëm që po qarkullon në rrjetet sociale ka ngritur alarmin tek organizatat që luftojnë dhunën ndaj grave. Në videot që po shpërndahen masivisht, burra të ndryshëm shfaqen duke simuluar goditje me grushte, therje me thikë apo duke drejtuar armë nga kamera, në atë që ata e quajnë “stërvitje në rast se ajo thotë jo”.

“Ajo”, sipas përmbajtjes së videove, janë gratë që refuzojnë flirtet apo propozimet seksuale të tyre. Edhe pse shumë prej këtyre videove publikohen si “shaka” apo “satirë”, ekspertët paralajmërojnë se normalizimi i një gjuhe të tillë dhune mund të ketë pasoja reale dhe të rënda.

Një nga rastet që ka tronditur opinionin publik është ai i Alana Rosa, një 20-vjeçare nga Brazili, e cila dyshohet se u sulmua brutalisht pasi refuzoi një burrë që e ngacmonte vazhdimisht.

Sipas raportimeve, Luis Felipe Sampaio, i cili më herët i kishte bërë dhurata dhe përpjekje të vazhdueshme për ta bërë për vete, hyri me forcë në banesën e saj në São Gonçalo, pranë Rio de Janeiro, dhe e goditi me thikë dhjetëra herë. E reja mbijetoi pas disa ndërhyrjeve kirurgjikale dhe një periudhe në koma të induktuar.

Nëna e saj deklaroi për autoritetet se i dyshuari kishte konsumuar përmbajtje të ngjashme në internet, duke shtuar edhe më shumë shqetësimet për ndikimin që mund të kenë këto trende online.

Rasti i Rosës nuk konsiderohet i izoluar. Sipas të dhënave të Ministrisë së Drejtësisë dhe Sigurisë Publike në Brazil, më shumë se 1,400 gra janë vrarë nga burra gjatë vitit 2025, një shifër rekord për vendin.

Në të njëjtën kohë, një studim i realizuar nga Universiteti Federal i Rio de Janeiro-s identifikoi mbi 120 kanale në YouTube që promovojnë përmbajtje mizogjiniste dhe urrejtje ndaj grave, me miliona ndjekës.

Ekspertët e lidhin fenomenin me kulturën e “machismo”-s, një mentalitet që promovon dominimin mashkullor dhe e sheh refuzimin e grave si një sfidë ndaj pushtetit të burrit.

“Bëhet fjalë për një hierarki ku gratë vendosen poshtë burrave dhe trajtohen si vartëse”, u shpreh Fiona Macaulay, eksperte për dhunën ndaj grave në Brazil.

Autoritetet braziliane të krimit kibernetik kanë nisur hetime për videot dhe i kanë kërkuar platformave si TikTok të heqin përmbajtjet problematike. Megjithatë, video të ngjashme vazhdojnë të rishfaqen në rrjete të ndryshme sociale.

Ndërkohë, shumë gra në Brazil thonë se nuk ndihen më të sigurta as në jetën e përditshme. Për këtë arsye, disa shkolla të arteve marciale kanë nisur të ofrojnë kurse falas vetëmbrojtjeje për gratë që ndihen të rrezikuara.