Një studim i fundit nga Instituti Amerikan i Forcës së Punës zbuloi se mbi gjysma e punonjësve besojnë se menaxherët e tyre kanë ndikim më të madh në shëndetin e tyre mendor sesa terapistët.
Shumë pjesëmarrës në studim pohuan se ndikimi i shefave në jetën e tyre personale dhe mirëqenien mendore është i krahasueshëm me atë të bashkëshortëve apo partnerëve të tyre. Nga përplasjet e vogla te mungesa e besimit, ajo që vihet në rrezik në një marrëdhënie me shefin, ngjan shumë me atë që ndodh në një marrëdhënie në çift.
Po si mund të shmangim hyrjen në një vend pune toksik që në fillim?
Përdorues të Reddit-it, të cilët kanë përjetuar "shefa toksikë", ndajnë disa shenja paralajmëruese, të ashtuquajturat "flamuj të kuq", që mund të dallohen që gjatë intervistës së parë dhe që zbulojnë mjedisin e vërtetë të punës përpara se të nënshkruani kontratën.
1. Shprehja "Ne jemi si familje këtu"
Një nga shenjat më të zakonshme, sipas shumë përdoruesve, është kur gjatë intervistës thuhet: "Këtu jemi si një familje."
Në një treg pune gjithnjë e më sfidues, shumë njerëz ndihen të detyruar të pranojnë menjëherë ofertën e parë që u del përpara. Dhe ndonjëherë, nuk kanë shumë zgjedhje. Por nëse keni mundësi, merrni kohë dhe eksploroni opsione të tjera, sepse, siç paralajmërojnë shumë përdorues, kjo frazë është "një flamur i kuq", që shpesh paralajmëron një ambient pune shumë toksik.
2. Pushimet
“Nëse punonjësit nuk marrin dot pushim dhe as menaxherët nuk e bëjnë këtë, atëherë aty ka një kulturë toksike pune,” shkruan një përdorues.
Ja çfarë duhet të vëzhgoni gjatë intervistës:
Si flitet për ditët e pushimit dhe pushimet vjetore?
Shpesh, menaxherët toksikë mburren me orët e gjata që punojnë vetë dhe që ua kërkojnë edhe të tjerëve, me justifikimin se “këtu jemi familje dhe ndihmojmë njëri-tjetrin”.
A marrin përgjigje të qarta pyetjet tuaja për pushimet dhe orarin?
Nëse përgjigjet janë të paqarta, shmangen apo procedurat duken tepër rigoroze, është e mundur që nuk vlerësojnë kohën tuaj të lirë. Bëni të qartë orarin që prisni të punoni dhe vendosni kufijtë që në intervistë. Reagimi i tyre do t'ju tregojë shumë.
3. Pyetje të drejtpërdrejta për sfidat dhe problemet
Mos kini frikë të bëni pyetje të sikletshme si:
“Cila është pjesa më e vështirë e kësaj pune?”
“Cili është një aspekt që kompania po përpiqet ta përmirësojë?”
Shumë përdorues thonë se nëse do t’i kishin bërë këto pyetje që në fillim, do të kishin shmangur një vend pune që më pas doli shumë problematik.
Për shembull, një frazë e zakonshme në intervista është “ekipi është në rritje”, por kur filluan punën, zbuluan se nuk kishte rritje fare, vetëm mbingarkesë pune dhe presion i vazhdueshëm.
Gjithashtu, pyesni:
“Pse u largua personi që kishte këtë rol para meje?”
“A jeni të kënaqur me rolin tuaj?
”Nëse përgjigjet janë të sinqerta dhe intervistuesi flet me qetësi, kjo tregon për një ambient pune më të shëndetshëm. Por nëse ndjeni tension ose shmangie, ka shumë gjasa që po fshihet diçka.
4. Kur nuk marrim përgjigje të qarta
Nëse i bëni pyetje për rolin, përgjegjësitë, orarin, mundësitë për ngritje në detyrë apo pagesën, dhe përgjigjet janë të mjegullta, jini të kujdesshëm.
Ka shumë mënyra për të dalluar një ambient toksik pune që në intervistë. Por këshilla më e vlefshme është: besoni ndjesisë që ju jep intervista.
Nëse diçka nuk ju duket në rregull, ose nuk ndiheni rehat me personin që keni përballë, ndoshta nuk është vendi i duhur për ju.
