Ikona e muzikës country Dolly Parton ka dhënë një përditësim për gjendjen e saj shëndetësore gjatë një daljeje publike në parkun tematik Dollywood, duke siguruar fansat se po kujdeset mirë për veten.
Artistja 80-vjeçare foli në ditën e hapjes së sezonit të ri të parkut në Tennessee, i cili këtë vit shënon sezonin e 41-të që nga hapja. Në fjalimin e saj, ajo tregoi se kohët e fundit ka pasur disa shqetësime shëndetësore dhe për këtë arsye ka reduktuar aktivitetet.
“Siç e dini, nuk kam qenë në turne. Kam pasur disa probleme të vogla shëndetësore dhe po kujdesemi mirë për to,” u shpreh ajo.
Parton pranoi se periudha e fundit ka qenë e vështirë edhe emocionalisht pas vdekjes së bashkëshortit të saj prej shumë vitesh, Carl Thomas Dean, i cili ndërroi jetë më 3 mars 2025 në moshën 82-vjeçare. Çifti kishte qenë i martuar për 58 vjet.
“Isha shumë e lodhur dhe e rraskapitur duke përjetuar dhimbjen për Carl-in dhe disa gjëra të tjera që po ndodhnin,” tha ajo. “M’u desh kohë të rimblidhja veten shpirtërisht, emocionalisht dhe fizikisht. Por tani gjithçka është mirë.”
Gjatë fjalimit, këngëtarja bëri edhe shaka me publikun, duke thënë që fansat të mos ngatërrojnë presidentin e kompanisë Dollywood, Eugene Naughton, me “bashkëshortin e saj të ri”. Ajo shtoi se që nga vdekja e Dean nuk është në një lidhje të re.
“Mendoj se Carl po më pret. Nëse do të shfaqesha në portat e parajsës me dikë tjetër, nuk do t’i pëlqente fare,” tha ajo me humor.
Dean ishte i njohur për jetën e tij larg vëmendjes së medieve, pavarësisht famës së bashkëshortes. Ai pothuajse nuk merrte pjesë në evente publike me të dhe gjatë viteve Parton ka publikuar shumë pak foto të tij.
Deklarata vjen disa muaj pasi në tetor 2025 në rrjetet sociale u përhapën spekulime për gjendjen e saj shëndetësore, pasi motra e saj, Freida Parton, kërkoi lutje për të në Facebook. Postimi shkaktoi alarm mes fansave dhe madje nxiti thashetheme se këngëtarja ishte në gjendje shumë të rëndë. Vetë Parton reagoi më pas me humor në një video në Instagram duke thënë: “Nuk kam vdekur akoma!”
Sipas burimeve pranë saj, gjendja e artistes është duke u përmirësuar çdo ditë. Ndërkohë, ajo vazhdon të qëndrojë në shtëpi, e rrethuar nga familja dhe miqtë, dhe së fundmi ka publikuar edhe librin e saj autobiografik "Star of the Show: My Life on Stage".
