Të gjithë e kemi përjetuar: fundjava vjen më në fund, planet janë bërë që më parë, por në momentin që vjen e shtuna, energjia duket sikur zhduket. Në vend të një daljeje me miqtë apo një aktiviteti që mezi e prisnit, përfundoni në divan, pa humor dhe pa dëshirë për asgjë. Nëse kjo ju tingëllon familjare, lajmi i mirë është se nuk jeni dembelë,  jeni thjesht të rraskapitur.

Lodhja mendore dhe fizike është një fenomen gjithnjë e më i përhapur, sidomos në një realitet ku puna nuk mbaron më në momentin që dilni nga zyra. Nëse e gjeni veten duke punuar gjatë pushimit të drekës, duke pranuar çdo kërkesë pa menduar dy herë apo duke menduar për punën edhe në kohën e lirë, atëherë trupi dhe mendja juaj po ju japin një sinjal të qartë: keni nevojë për pushim.

Ky realitet prek veçanërisht brezin Millennials, të cilët përpiqen të balancojnë karrierën, jetën personale dhe presionet financiare në një botë gjithmonë e në ndryshim. Kufijtë mes punës dhe jetës private janë bërë gjithnjë e më të paqartë, ndërsa orët shtesë dhe projektet paralel janë kthyer në normë. Si pasojë, ndjesia e rraskapitjes nuk është më përjashtim, por për shumëkënd, përditshmëri.

Megjithatë, ka mënyra konkrete për ta mbrojtur energjinë dhe mirëqenien tuaj. Një hap i parë është të mos thoni “po” menjëherë për çdo angazhim. Jepini vetes kohë për të menduar, edhe 24 orë janë të mjaftueshme për të kuptuar nëse diçka ia vlen vërtet apo jo. Të vendosni kufij nuk është egoizëm, por një formë e domosdoshme e kujdesit për veten.

Një tjetër strategji e thjeshtë, por efektive, është krijimi i një rutine që sinjalizon fundin e ditës së punës. Mund të jetë një shëtitje e shkurtër, një stërvitje e lehtë, ndërrimi i rrobave apo thjesht fikja e kompjuterit në një orar të caktuar. Këto gjeste të vogla ndihmojnë trurin të kuptojë se është koha për të pushuar.

Si përfundim, është e rëndësishme të mbani mend se lodhja nuk është dobësi dhe as mungesë vullneti. Është një reagim i natyrshëm i trupit ndaj mbingarkesës. T’i jepni vetes kohë për të pushuar nuk është luks,  është nevojë. Dhe mbi të gjitha, është diçka që e meritoni.