Një foto e aktorit Chad Michael Murray para dëmtimit në hundë që ai pësoi në rini ka habitur fansat, pasi tregon një pamje krejt ndryshe nga ajo që njihet sot. Imazhet që po qarkullojnë në rrjetet sociale e tregojnë aktorin 44-vjeçar para dhe pas incidentit kur, në moshën 18-vjeçare, iu desh të rregullonte hundën.
Në vitin 2004, Murray tregoi se u sulmua nga tre persona, çka i shkaktoi dëmtimin.
“Më sulmuan në Burger King kur isha 18 vjeç dhe më zhvendosën hundën në anën tjetër të fytyrës,” tha ai për Entertainment Weekly. “Ishin tre persona, çfarë mund të bëja?” shtoi.
Sipas tij, mjekët nuk i bënë as rreze X, por thjesht i vendosën hundën përsëri në vend. Chad Murray këmbënguli se nuk bëhej fjalë për operacion estetik.
Fotot e vjetra, përfshirë një nga libri i maturës i vitit 1999, janë bërë virale në rrjetin X, ku shumë përdorues komentojnë ndryshimin e madh në pamjen e aktorit. Disa shprehen se duket si një person krejt tjetër, ndërsa të tjerë thonë se një ndryshim i tillë në hundë mund të transformojë tërësisht fytyrën.
Aktori foli sërish për pasigurinë që ka ndaj hundës në një intervistë për Newsweek në gusht 2025.
“Nuk më pëlqen hunda ime sepse nuk është hunda ime,” tha ai, duke përshkruar ndërhyrjen si një rregullim të thjeshtë pas incidentit.
Megjithatë, jo të gjithë e panë ndryshimin negativisht. Disa fansa vlerësuan pamjen e tij pas dëmtimit, duke thënë se i jep më shumë karakter dhe e bën edhe më tërheqës. Madje, një komentues shkroi me humor se ndonjëherë gjërat që duken të këqija në fillim mund të rezultojnë bekime të fshehura.
Përveç këtij incidenti, Murray ka kaluar edhe një problem serioz shëndetësor në adoleshencë. Në moshën 15-vjeçare, ai përfundoi në spital për dy muaj e gjysmë pasi iu përdrodhën zorrët, duke humbur rreth 50% të gjakut dhe duke qenë pranë vdekjes para se të rikuperohej pas operacionit.
