Edhe shprehjet më të thjeshta dhe më të zakonshme mund të kenë një ndikim të madh në mënyrën se si të tjerët na perceptojnë.

Në një intervistë pune, për shembull, disa fjalë mund të bëjnë diferencën mes një kandidati që duket i sigurt dhe energjik dhe dikujt që nuk është i bindur për aftësitë e veta.

“Është e rëndësishme t’i zgjedhësh fjalët me kujdes dhe të përdorësh një gjuhë bindëse”, theksojnë ekspertët e komunikimit Kathy Petras dhe Ross Petras.

Sipas tyre, kjo qasje është veçanërisht e dobishme kur komunikon me një punëdhënës, koleg, mik apo partner.

Sipas ekspertëve, këto dy fraza mund të kenë efektin e kundërt, duke ju bërë pa dashje të dukeni të pasigurt:

“Nuk e di”

Është një shprehje që e përdorim shpesh, qoftë për të fituar pak kohë për t'u menduar, qoftë për të shmangur një bisedë. Megjithatë, ajo mund të na bëjë të dukemi të pasigurt.

Në vend të saj, mund të thuhet:

“Është një pyetje shumë interesante. Më jepni një moment ta mendoj.”

Sipas ekspertëve, kjo është veçanërisht e rëndësishme në intervistat e punës, ku mund të përballeni me pyetje të papritura apo sfiduese.

“Më falni që po pyes, por…”

Të kërkosh ndjesë mund të duket shenjë mirësjelljeje, por përdorimi i tepërt i kësaj shprehjeje, sidomos kur situata nuk e kërkon, mund ta dobësojë mesazhin që vjen më pas. Madje, edhe kërkimfaljet e ardhshme mund të humbasin peshën e tyre.

“Kur përdor shprehje që nënkuptojnë ndjesë, si ‘Më vjen keq, kam edhe një pyetje të fundit’ apo ‘Ndoshta jam vetëm unë, por…’, mund të duket sikur po e zvogëlon veten,” theksojnë Kathy dhe Ross Petras.

Zgjedhja e fjalëve të duhura nuk është thjesht çështje komunikimi, është çështje ndikimi dhe identifikimi.