Kur flitet për lumturinë, vendet nordike janë gjithmonë në krye të listave. Por Finlanda ka arritur diçka që shkon përtej trendeve: për të nëntin vit radhazi, renditet si vendi më i lumtur në botë, sipas World Happiness Report.
Ironikisht, ky është një vend ku dimri zgjat me muaj të tërë, temperaturat janë të ulëta dhe ka pak ditë me diell. Megjithatë, pavarësisht kushteve që teorikisht do ta bënin jetën më të vështirë, finlandezët raportojnë nivele të larta kënaqësie.
Arsyet kryesore për këtë nivel lumturie: arsimi është falas, kujdesi shëndetësor është i garantuar dhe balanca mes jetës dhe punës respektohet. Por përtej politikave, ka edhe një mënyrë të të jetuarit, disa zakone dhe bindje të vogla që, të marra së bashku, bëjnë ndryshim.
Ja çfarë bëjnë ndryshe:
1. Nuk shtiren sikur janë mirë kur nuk janë
Në shumë vende, “jam mirë” është përgjigjja automatike, edhe kur nuk është e vërtetë. Në Finlandë, ka më shumë hapësirë për të treguar të vërtetën për gjendjen tonë emocionale. Të thuash “nuk jam mirë” nuk shihet si dobësi, por si diçka normale. Dhe ndoshta kjo e bën më të lehtë për njerëzit të përballen me ndjenjat e tyre.
2. Barazpesha mes jetës dhe punës nuk është luks, por standard
Finlandezët punojnë, por nuk jetojnë për të punuar. Orët e punës janë të arsyeshme, pushimet respektohen dhe koha e lirë ka vlerë. Kjo krijon hapësirë për pushim, për veten dhe për jetën jashtë zyrës, diçka që ndikon drejtpërdrejt në mirëqenie.
3. Janë gjithmonë pranë natyrës
Në Finlandë, natyra nuk është “arratisje fundjave”, por pjesë e përditshmërisë. Ekziston edhe koncepti i “të drejtave të çdo njeriu”, që lejon këdo të përdorë pyjet, liqenet dhe hapësirat natyrore falas dhe me respekt. Kjo do të thotë se aktivitete si kampingu, mbledhja e manave, mbledhja e kërpudhave, noti, ecja, kalërimi apo të bërit ski janë të gjitha falas në këto hapësira publike.
4. Nuk ndalojnë së mësuari kurrë
Mësimi i gjërave të reja nuk lidhet vetëm me karrierën. Mund të jetë një kurs qeramike, një recetë e re apo një aktivitet i thjeshtë. Ideja është të dalësh nga rutina dhe të ndjesh që koha ka kuptim dhe kjo ka ndikim të drejtpërdrejtë në shëndetin mendor.
5. Nuk e jetojnë jetën për ta treguar në rrjete sociale
Krahasimi i vazhdueshëm është një nga burimet kryesore të pakënaqësisë. Finlandezët, në përgjithësi, nuk janë të fokusuar te shfaqja e suksesit. Kjo i mban larg presionit për të qenë “perfekt” në sytë e të tjerëve.
6. Besimi mes njerëzve është i vërtetë
Finlanda është një nga vendet me nivelin më të lartë të besimit social. Marrëdhëniet janë të forta dhe vetmia shihet si një problem serioz që duhet adresuar. Në një shoqëri ku njerëzit i besojnë njëri-tjetrit, edhe përditshmëria bëhet më e lehtë.
7. Barazia
Politikat sociale synojnë të minimizojnë diferencat ekonomike dhe të krijojnë mundësi për të gjithë. Klasa e mesme është e fortë dhe shfaqja e pasurisë nuk është normë. Kjo ul ndjesinë e krahasimit dhe konkurrencës së vazhdueshme. Njerëzit më të pasur në Finlandë mund të ngasin një Volvo të vjetër ose më së shumti një Mercedes pak më të shtrenjtë, por shuuumë rrallë një Lamborghini.
8. Lumturia është qetësi
Në Finlandë, lumturia nuk lidhet domosdoshmërisht me emocionet e forta apo momente spektakolare. Ajo lidhet më shumë me një ndjenjë kënaqësie dhe qetësie me jetën dhe me gjërat që ke.
Në fund, është e rëndësishme të kuptohet se lumturia nuk është vetëm përgjegjësi individuale. Ajo ndikohet edhe nga kushtet, politikat dhe mënyra si është ndërtuar shoqëria. Mund të bësh zgjedhje për veten, por realiteti ku jeton luan gjithashtu një rol të madh.
Dhe ndoshta kjo është një nga arsyet kryesore pse Finlanda vazhdon të mbetet në krye: njerëzit atje nuk përpiqen më shumë se ne që të jenë të lumtur, por thjesht jetojnë në një sistem që e bën këtë më të mundur.
